శ్రీరామ (29).

(సులభంగా సంస్కృతం నేర్చుకుందాం).

​

హరిః ఓం

శ్రీ గురుభ్యోనమః.

శ్రీ మహా గణాధిపతయే నమః.

శ్రీ మహాసరస్వత్యై నమః.

శ్రీ కాశీ కృష్ణాచార్య గురుభ్యోనమః.

----------

ఈరోజు ( ) 29 వ పాఠం చెప్పుకుందాం.

29. ఏకోనత్రింశః పాఠః ( ఇరువది తొమ్మిదవ పాఠము ).

అంతకు ముందు అష్టా వింశః (28 వ) పాఠంలో అభ్యాసానికి ఇచ్చిన తెలుగు వాక్యములకు బ్రాకెట్ లో సంస్కృత వాక్యములను ఇచ్చాను.

మీరు వ్రాసిన వాక్యములతో సరిచూసుకుని అవసరమైన సవరణలు చేపట్టగలరు.

అభ్యాసము (28).

1. నా అన్నను పిలుచుటకు ఎవరు వెళ్ళినారు ?

( మమ అగ్రజం ఆహ్వాతుం కే అగచ్ఛన్ ? ).

2. ఎవరును వెళ్ళనిచో మీరే వెళ్ళుడు.

(కే అపి న అగచ్ఛన్ తర్హి యూయం ఏవ గచ్ఛత ).

3. పిమ్మట నేనును అక్కడికి రాగలను.

( అనంతరం అహమపి తత్ర ఆగమిష్యామి ).

4. వారిపుడు భోజనమునకు వత్తురో, రారో, అడుగుము.

( తే ఇదానీం భోజనార్థం ఆగమిష్యంతి వా ,

న వా పృచ్ఛ).

5. మీరే అడుగుడు.

( యూయమేవ పృచ్ఛత ).

6. మీరు ఊరకుండుడు ; వారే వచ్చెదరు.

( యూయం తూష్ణీం స్త ; తే ఏవ ఆగమిష్యంతి ).

7. మిమ్ము ఎవరు భోజనమునకు పిలిచినారు ?

( యుష్మాన్ కే భోజనార్థం ఆహ్వయన్ ? ).

8. మీ అన్న పిలిచినాడుగా.

( తవ అగ్రజః ఆహ్వయత్ వా ).

9. మా అన్న ఊరిలోనే లేడే ; ఎట్లు పిలిచెను ?

(మమ అగ్రజః గ్రామే నైవ ఆసీత్; కథం ఆహ్వయత్ ? ).

10. వాడీవేళ వచ్చినాడని మా తమ్ముడు మా ఇంటిలో

చెప్పినాడు.

( సః అద్య ఆగచ్ఛత్ ఇతి మమ అనుజః అస్మద్గృహే అవదత్ ).

​

29. ఏకోనత్రింశః పాఠః ( ఇరువది తొమ్మిదవ పాఠము ).

పదములు.

అస్మాన్ = మమ్ము.

వృక్షాత్ = చెట్టునుండి, చెట్టువల్ల, చెట్టుకంటె.

వృక్షేభ్యః = చెట్లనుండి, చెట్లవల్ల, చెట్ల కొరకు.

ఆహూయ = పిలిచి.

పాతుం = త్రాగుటకు.

పృష్ట్వా = అడిగి.

పాస్యతి. = త్రాగ గలడు.

పతతి = పడుచున్నాడు.

చరతి = నడుచుచున్నాడు.

పదముల ప్రయోగము.

1. కిం అరే క్షీరం పాస్యసి కిం ?

( ఏరా ! పాలను త్రాగుతావా ?).

2. బాలకః వృక్షాత్ అపతత్/

( బాలుడు వృక్షము నుండి పడెను ).

3. త్వం తత్ర మా గచ్ఛ/

( నీవు అక్కడికి వెళ్ళవద్దు ).

4. తే బాలకాః దౌష్ట్యం కరిష్యంతి/

( ఆ బాలురు అల్లరి చేయగలరు ).

5. బ్రాహ్మణాః స్నానం కృత్వా తటాకాత్ ఆగచ్ఛంతి/

( బ్రాహ్మణులు స్నానము చేసి చెరువు నుండి వచ్చుచున్నారు ).

6. అనంతరం భోజనం కరిష్యంతి/

( తరువాత భోజనము చేయగలరు ).

7. అహమపి స్నానార్థం గచ్ఛామి/

( నేనును స్నానం చేయుటకు వెళ్ళుచున్నాను ).

8. భోజనార్థం ఆలస్యం మా కురుత/

(భోజనానికి ఆలస్యం చేయకండి ).

9. తవ జనకః ఏతావత్పర్యంతం గ్రామాత్ నాగచ్ఛత్/

(నీ తండ్రి ఇంతవరకు ఊరినుండి రాలేదు ).

10. శ్వః ఆగమిష్యతి కింవా ; తవానుజం ప్రక్ష్యసిచేత్ సః వదిష్యతి/

( రేపు వస్తాడేమో నీ తమ్ముడిని అడిగితే వాడు చెప్పగలడు ).

అభ్యాసము.

ఈ క్రింది తెలుగు వాక్యములను సంస్కృతంలో వ్రాయండి.

1.ఆ పిల్లవానిని పాలు త్రాగుటకు పిలువుము.

2. అక్కడ నా మంచమున్నదిగాని ఇటు తీసికొని రమ్ము.

3. నేను తీసికొని రాజాలను.

4. మీ తమ్ముడు తీసికొని రానిమ్ము.

5. నీవు పిల్లవానిని అడిగి అక్కడకు వెళ్ళుము.

6. ఆ పిల్లలు అల్లరి చేయుచున్నారు.

7. మాయొక్క పండ్లను ఎవరు తిన్నారు ?

8. మీరే తిన్నారుగా.

9. అయ్యో ! చెట్లనుండి పండ్లు పడ్డవి.

10. మీ చెంబులో కొంచెము పాలున్నచో నేను త్రాగెదను.

(సశేషం)

శుభమస్తు,

తూములూరి మధుసూదనరావు,